Stichting Monumentenfonds tin un Web Site nobo, fresco y bunita. WWW.monumentenfondsaruba.com

Cu orguyo Stichting Monumentenfonds Aruba (SMFA) ta anuncia lansamento di su website nobo. For di 15 di juni por bishita e website www.monumentenfondsaruba.com. Stichting Monumentenfonds a wordo funda na 1996 pa financiamento, adquicion y mantencion di monumento y tambe atrae fondo y co-financia restauracion di monumentonan den mannan priva na Aruba. Pa asina enrikece Aruba su bunita herencia cultural y monumental. Pa hopi aña e fondo no a funciona adecuadamenten. Na Januari 2010, Minister di Cultura, Sra, Michelle Winklaar, a nombra un directiva y un director nobo. E maneho nobo di e fondo lo tene cuenta cu e vision di Gobierno pa cu nos herencia cultural infra-structural. Un di e metanan ta pa atrae fondo di exterior. Pa e motibo aki a scoge pa lansa un website na e idioma Hulandes y despues lo bin e parti na Ingles y Papiamento. Asina nos por cumpli cu e demanda pa informacion cu ta bin for di tur parti di reino y for di Aruba mes.

E website ta uno moderno y cu colornan bibo y bunita. E color blauw ta refleha nos lama y cielo y e color cora nos tera y e calor di nos pueblo y su stimacion pa su cultura y herencia monumental. E logo mes ta un refleho di e profil cu ta visibel riba e fachada di e casnan di antes.

E website ta uno facil pa maneha y ta contene hopi informacion di kico e trabou di SMFA ta ensera, su structura y un galeria di potret. E potretnan ta dividi den dos seccion, e prome ta monumentonan na Aruba en general y e di dos ta monumentonan cu ta cay bou di Stichting Monumentenfonds.
E galeria di portret ta precioso, e calidad di e potretnan ta uno hopi halto.
E website aki ta dinamico. E lo wordo “updated” regularmente y e preguntanan cu nos lo ricibi lo wordo atendi debidamente.
Nos ta suplica un y tur pa bishita e website aki y duna nos boso comentario y opinion ariba www.monumentenfondsaruba.com.

L.A. van Romondt
Director